Baru Ma Adu i Dadi Dudadu: Puisi-puisi Ngofa Gura

BARU MA ADU I DADI DUDADU

fitako se hate baru ma adu
fo si gulaha dudadu
rau dofu i tadu-tadu
mancia dofu i tego katoma adu

toti hate sigoko ngasu
sitango la i dadi dango
oro ginato sema afu-afu
sidadi gumi, sinao budiku

afa igo ma rau, si tiyadi katu
si tan daku tara katoma nyeku
feno ena fato-fato la i dadi beno
kore se besa aku fo mataku

oro mari sidadi dodika
hate ma tore sigulaha duto
dulmaso igo sidabi uku
dodika madaha uku i riha

oro pang, siteru dodika manyeku
falo ake katoma dabo-dabo
si tahi ake kam madaha
wele gasa katoma hito

DUMAHA

futu madaha mo dumaha,
wuwasu kado magasa habari
nyinga ici i ma bicara demo lamo
gate pupuru i tala-tala, i hodu tola

lobi kotu i dola ara masohi
momina gudu i kafo-kafo
besa furai tola dudagi
gugaro nyinga i hodu tima

mabubu besa sibusa balisa
siparo alo marasai malo
dudagi gudu i dadi lofo
pane mari sitola dehe

gogoro kado nyinga i ogo
tike dudadu sema maga’adu
mongo-mongo nyinga i oli
simore lamo maku turifa

GULEBO FUTU MADAHA

wange i masoru tara
ri gate ne i tala-tala
sonyinga ni rupa i hodu tola
eli-eli ni dudara
roro raim fo kadiara

gamam i masibai-bai
ri nyinga ne i hira ma dudai
susege ni gugasa toma diri
i tima hodu toma ri miri

kore hoa dai isa, magasa nyinga ma balisa
ri gate ne i wigo-wigo, lofo-lofo sari i doro
gulebo nyinga madaha i siloce ri bubaso
i malui-lui, lofo-lofo sari i tola

garura nyinga futu madaha
masiparo duka, sigolo alo ni rupa
masiaka nane madaha, garaki ni gunaga i rika-rika.

KAFO-KAFO

toma nyonyohi wange i mawaje
roro se cai-cai, marupa doka bela-bela majai
ngana se ngori, ngori se ngana
toma tagi se tego, si rasai i ogo ua

sema wange i madiadi wange
sema ahad madago madago ahad
i mawaje kama demo ua, mai i sema ngale

ngale sema ngale,
toma ni mada, sema aki no si penga
sema demo-demo no si temo
i hira toma ri ngungano

ngungano toma nunako i malo pako-pako
lamo duga toma demo-demo
toma momina marupa i kafo-kafo
toma sonyinga lamo bubaso

SIDIKE NGA LULEO

wange madiadi wange
demo-demo i hira ma ngale
ara madiadi ara
i sitemo demo dofu,
madaha duga hara-hara

jaji rimoi togu rimoi…
madiahi waro ua
sio… ja’ara…

i sileo-leo na ngungano
sibai rupa duga tano-tano

taong madiadi taong
marupa ena bato

SIGARO…!
SIGADO…!

sema nyele-nyele
ana i fandun ua ena ma ngale

WILU…!
KUKARO…!

sema turara lamo, madaha demo pako
duga giha bugo dadi ka nunako

nga’ luleo, duga i sileo-leo

Sio…Dodoku