“Hiri Ma Kie Ici”: Serangkai Puisi Ngofa Gura

Hiri Ma Kie Ici,

Hiri ma kie ici,
Dofu mancia i maku hasi,
Tike dudego sema jaji-jaji,
Sema demo madaha sasi,

Hiri ma kie ici,
Dofu mancia i maku riri,
Dero dudego sema firi-firi,
Toma nyinga maku mangiri,

Hiri ge toma diri,
Toma diri i sema miri,
Jaga aki demo palisi,
Afa mara dahe bobiki,

Hiri-hiri giha madiki,
Polu-polu fo maku tiki,

Nyinga Ma Budiku Guraci

Ma awal maku madai
Maku nunako toma dudagi
Toma momina to garaki
Sababu majahaya sema ni diri

Sema demo ngale moi romdidi
Toma nyinga to sisabi
Masitemo toma ri aki
Sidurihi toma ni miri

Toma ni gate i torori
Masinao sema lulahi
Sibudiku toma jaji
Manunako sema guraci

Piara se kadiara, dudara se eli-eli

Toma Awal

Toma awal i malo
Sema dege ma doro
I uhi tike loleo
Sidadi ka gohoro

Toma awal si nunako
I mawaje toma obo lamo
Si nyata toma ngongoma malefo
Si habar sema gari ma demo

Sisupu toma gam lamo
Sema gasa gogonyo
Madaha haso
Sema jaji ma demo pako

Toma dudagi i dadi ka jojoko
Toma dudego i dadi ka jojoho

Ma aher i kureho
Dahe wuwasu madaha gugaro
I kado masigaro
Duga sitemo demo lulamo
Si eli toma nyinga lamo
Si pasa mademo malo

Dodoku

Dodoku i hodu togu,
Tagi se toku mara fo babu,

Dodoku i hodu togu,
Hida-hida mara mari pilatu,

Dodoku i hodu togu,
Joko dahe-dahe afa mara no polu-polu,

Dodoku i hodu togu,
Toku-toku daka se ino moju,

Dodoku i hodu togu,
DEMO JAJI I DOFU LAKU,

Dodoku i hodu togu,
DEMO JAJI I GUGU-GUGU

Sio….DODOKU

Momina Yaya

Kangela i jaga ngara
Ara sio bubula ma laha
Si taku kore, wange ma geca
Duga No ahu doka samaka besa-besa

Yaya ge au ma durure
Yaya ge au ma bobane
Yayq ge au ma susege
Yaya ge au ma momole

Masaabab Yaya ge Ikhlas ma ngale
Poga yaya, poga ni kangela
Cum yaya, duhuru tufa ma ngawa
Ongo yaya, momina JOU ni rupa
Saha yaya, ge kabul i mina-mina
Masabab Yaya ge Tawakal ma soa

Penulis: Ngofa Gura