“Yaya Na Balisa”: Serangkai Puisi Ngofa Gura

Yaya Na Balisa

Tifa subuh i polote,
Dima-dima yo pala,
Sihaka nunako waktu i maku Tika,
Wange ma nita i fela,

Sohi se ofi siawal na munara
Yaya mi balisa, doka kultidi tero dufahe
Mi gia ka gata-gata
Mi Mada ka daho-daho
Mi ugu ka curupapa

Ruju duto katoma dudika,
Sidabi uku Sisabi nyinga,
Sijaga ngofa na oho se oke,
Sidiyahi na pake-pake

Ngofa Kalase

Ito se dehe i sidadi ka Fala
Jingutu ao se rore i waje laha
Gia ma Jiko i gulaha ka nora
Masiparo alo toma futu konora

Namo i matemo sihaka waro
Tolo dolo-dolo i maku sigaro
Hafu-hafu i maku afu sari ma fatu
Futa-futa i mafato sigaro hau

Soma marehe i sidoro mehe-mehe
Siruru gaba ngale-ngale, afa i kaale
Topo sari simurari fati
Daji-daji doro hado ma bati

Idi lamo sigaro naro
Si ici gumi siwosa Nyao
Nyao dofu i toro-toro
Toro wosa popoje lamo

Silape Oti sibere Soma
Salapa nyao peti i Oma

Mariolaha Toma Buku Manyeku,

Mariolaha toma buku manyeku,
Maku waje fo mapolu,
Aku fo tagi se toku,
Mauto ka toma nyeku,

Ruba banga se macacu,
Fo koko dogo ruku-ruku,
Sema tego macibuku,
Toma hate gaku ma’adu,

Sema fuheka se nunau,
I coho peda ma fatu,
Gugu kuda-kuda uda ka gofu,
Gofu gumi i maku afu,

Toti hate sidadi ngasu,
Sigoko dadi ka ngau-ngau,
Gulaha hisa hado libuku,
Dabi uku gulaha gogobu,

Pala mari, rete dadi ka dofu,
Fai kaha gulaha maguru,
Sipolu ena sidadi tofu,
Oco igo oro gonofu,

Uto joro ka toma guru,
Dofu lulahi se jou madihutu,
Si poto ena la i ahu,
Haka ake murari gaku,

Sidofu sofo aku si fuku,
Oro masofo gulaha dulbutu,
Si gasa ena ka toma butu,
Fodi dofu maku tulubutu,

Mariolaha sidadi gugahu

Sidurihi Balisa Nyinga

Futu se wange to masidike, futa-futa si to tike
Gunaga lamo rimoi i monge-monge
Gulaha Ri nyinga i wele-wele

Oras kanang fo maku waje,
fo masitemo demo madahe
Sijaga laha ena mangale, sidagi ena mehe-mehe

Siboi demo i sema mahe, sirasai ena i ngale-ngale
I dadi jarita sema nyele-nyele
To ogo otu doka Nyare

Duga se JOU bato to lulahi sibere,
Sileo nyinga doka jiko se dehe
Masitaku rupa toma oras kore
Sisanga Bubaso toma oras ngahe

Sidurihi balisa katoma bubane
Sisanga duka ma lang lage-lage
Sideru Laha-laha mara i lenge
Sigoko diki aku i dahe-dahe

Duga Dudadu

No kado duga tudu,
Toma oras ri nyinga se dopolo i maku dutu,
Sema miri se gate no sitaku,

Toma fala ma luketu, To sangka no matadu,
Mongo-mongo sema toma dudu,

Masitemo demo gaku, duga oe se ua aku sitantu,
Toma daha no si supu, sipudiku dadi ka mangaku.

Afa no mahiku!
Afa no mataku!

Hiku dopolo biki i copu
To sangka fala, mongo duga dudadu.